KAAPSTAD – Die sagte pienk kleure van Oktober het die atmosfeer gevul op Saterdag 11 Oktober toe gemeenskapslede, oorlewendes en ondersteuners bymekaar gekom het op D’Aria-wynlandgoed vir die CIC Pienk Oktober-borskankerbewusmakingsdag.
Die geleentheid het opregte stories, opvoeding en hoop saamgesnoer te midde van die rustige wingerde van die Durbanville-wynvallei.
As hoofborg en trotse gasheer het D’Aria-wynlandgoed sy diep verbintenis tot maatskaplike verantwoordelikheid beklemtoon en is hy toegewy aan gemeenskapsopbou en genesing. Die dag se program, wat in vennootskap met die Community Intervention Centre (CIC) aangebied is, het nie net die stryd teen borskanker gevier nie, maar ook die groter roepstem vir geestelike en emosionele welstand.
CIC se werk
Die Community Intervention Centre is ‘n niewinsgewende organisasie wat in die Blouberg- en omliggende gemeenskappe gevestig is. CIC bied gratis 24-uur noodtraumaberading en emosionele ondersteuning aan slagoffers van krisisse – van ongelukke en aanrandings tot gesinsgeweld en skielike verlies.
In noue samewerking met plaaslike hospitale, die polisie en nooddiensspanne bied CIC se opgeleide trauma-respondente onmiddellike sorg en leiding aan individue en families in hul weerbare oomblikke. Hul missie strek verder as net noodhulp – dit gaan oor die herstel van waardigheid, die bevordering van geestesgesondheid en die ondersteuning van mense op hul pad na herstel.
CIC bevorder vroeë ingryping, trauma-opvoeding en holistiese welsyn deur hul bewustheidsveldtogte en gemeenskapsprogramme.
Die Pienk Oktober-inisiatief vorm deel van hul voortdurende missie om vroue bewus te maak van hul eie gesondheid, en om emosionele veerkragtigheid en genesing te bevorder.
‘n Dag van hart en genesing
Suzanne Trotzky, bestuurder van D’Aria-wynlandgoed, het die gaste hartlik verwelkom.
“Dit is vir ons ‘n voorreg om ‘n geleentheid aan te bied wat mense byeenbring wat ‘n hart het vir deernis, moed en genesing,” sê Trotzky.
“By D’Aria-wynlandgoed glo ons dat gemeenskapsorg deel is van wie ons is – dit is gewortel in ons wese, net soos die wingerde wat ons omring. Om CIC te ondersteun, herinner ons daaraan dat ware genesing dikwels begin met verbinding – eerlike gesprekke, oop harte en die moed om weer hoop te kies.”
Trotzky voeg by: “Hierdie byeenkoms gaan oor meer as net bewusmaking – dit gaan oor die eer van krag, die viering van ondersteuning en die erkenning van die diep krag van gemeenskap. CIC is ‘n lewenslyn in ons midde.”
Ná ‘n vrolike middagete op die landgoed het die gaste ‘n insiggewende boodskap oor borskankerbewusmaking gehoor, wat die belangrikheid van vroeë opsporing en mammogramme beklemtoon het – en die kragtige herinnering dat borskanker geen grense van ouderdom, geslag of kultuur ken nie.
Die gasspreker vir die dag was Rachel Kolisi wat gevolg het met ‘n praatjie oor geestesgesondheid en selfversorging wat diep by elkeen aanklank vind.
Kolisi het eerlik gepraat oor haar persoonlike pad van innerlike genesing en gaste herinner dat welstand begin by die versorging van liggaam, siel en gees.
Sy het vertel van die waarde van geloof, joernaalskryf en daaglikse beweging as ankers vir emosionele balans.
Kolisi se boodskap het elkeen in die gehoor aangeraak.
Die atmosfeer was gevul met bewondering nadat sy klaar gepraat het en baie kon met haar vereenselwig.
