Die Laerskool Mikro het verlede week sy 50ste skooljaar met ’n spesiale Fees50-saalbyeenkoms begin.
Van die eerste sub-A’s van 1972 en oud-skoolkomiteelede was onder die eregaste.
Ds. Francois Cillié, oud-beheerliggaamvoorsitter, het in sy boodskap gepraat oor die skool se waardes wat in die naam Mikro opgesom word, naamlik mededeelsaamheid, integriteit, kreatiwiteit, respek en omgee.
Gloudina Roux, oud-musiekonderwyseres, se feeslied wat sy geskryf het, is by die geleentheid bekendgestel en deur die personeellede gesing.
Die huidige en derde skoolhoof, Louis Mouton, sê hulle vertrou 2022 sal ’n meer “normale” en positiewe jaar wees.
“As skoolgemeenskap wil ons graag hierdie besondere jaar vir Laerskool Mikro met dankbaarheid en toewyding aanpak,” sê hy.
“Ons wil met die verskeie aktiwiteite wat vir die feesjaar beplan word, eer bewys aan ons pragtige skool en almal wat die afgelope 50 jaar hier betrokke was.”
Die skool se heel eerste Penveerfees – met ’n karnaval en kunstenaars soos Demi-Lee Moore en Snotkop – vind op 26 Februarie plaas.
Ander geleenthede wat beplan word sluit in ’n mini-reünie op 18 Maart) ’n pretloop by Zevenwacht op 19 Maart, ’n sportdag in Augustus, ’n skoolkonsert in September, ’n langtafel-ete, asook ’n pypkarresies en pretdag in Oktober.
You must be logged in to post a comment.