Beamptes van die Stad Kaapstad se metropolisie het Vrydag 10 Oktober ’n 27-jarige man in hegtenis geneem nadat honderde liters diesel in sy besit gekry is.
Sy inhegtenisname kom nadat die polisie ’n wenk ontvang het oor diesel wat glo by ’n adres in Parowvallei verkoop word.
Ruth Solomons, woordvoerder, sê hul beamptes het die perseel om 08:00 besoek en afgekom op 400 liter diesel in verskeie houers op die perseel. Die geskatte waarde daarvan is sowat R9 000.
Die verdagte kon nie bewyse vir die aankoop daarvan verskaf nie, en kon ook nie enige dokumentasie wat hom toelaat om diesel te verkoop, verskaf nie, sê Solomons.
Die verdagte word by die Parow-polisiekantoor aangehou en word aangekla van die besit van vermoedelik gesteelde goedere, sowel as van die verkoop van produkte sonder die nodige verkoopslisensie deur die bestuur van die petroleum-produk, sê Solomons. Sy sê nog klagte kan bygevoeg word.
