Die Kewtown-egpaar Sheila en Kenneth Cheemee het ’n mylpaal bereik wat nie sommer vir enigeen beskore is nie.
Met die viering van hul 50ste huweliksherdenking op Vrydag 31 Januarie het die egpaar al byna ’n leeftyd saam deurgebring.
Kenneth (77) en Sheila (78) het ontmoet toe hulle tieners was en het in 1975 amptelik die knoop deurgehak.
“Ons was vriende sedert ons tienerjare. Destyds het mense baie kinders gehad, so die meeste van ons susters en broers was ook vriende. My man, Kenny, was destyds ’n prominente sokkerspeler en ons het altyd sokkertoernooie bygewoon. Dit is toe dat ek op hom verlief geraak het,” sê Sheila.
Sheila se broer, Colin Cyster, beskryf die paartjie as “’n ware voorbeeld vir ons. Hul verhaal van liefde, toewyding, begrip en respek is ’n voorbeeld vir ons almal”.
Hul geheim vir ’n gelukkige huwelik is om God in die middel van alles te plaas en eerlik met mekaar te wees.
“Elke huwelik is uniek, maar ons het gedeelde verantwoordelikhede, vertroue en bowenal God se liefde is ons resep,” sê hulle.
Die egpaar is geseën met drie kinders en het nou ses kleinkinders en een agterkleinkind.
