Die familie van die wêreldbekende sanger van Elsiesrivier, Jonathan Butler, bars van trots nadat hy onlangs met ’n eredoktorsgraad deur die Universiteit Stellenbosch vereer is.
Die universiteit het bevestig dat ses “uitsonderlike individue” eredoktorsgrade by die instelling se komende Desember-gradeplegtighede sal ontvang.
Die jazz-sanger en liedjieskrywer Butler, die Booker-pryswenner Damon Galgut, die filantroop Wendy Ackerman, die bekende epidemioloog vir kliniese aansteeklike siektes, prof. Salim Safrudeen Abdool Karim, die visioenêre ekonoom prof. Deirdre McCloskey en die land se langsdienende direkteur-generaal, dr. Philemon Mphathi (Phil) Mjwara, voorheen van die departement van wetenskap en innovasie, is die jongste groep wat erkenning sal ontvang vir hul prestasies en diens.
Die universiteit ken jaarliks eredoktorsgrade toe aan buitengewone individue wat hulleself in hul onderskeie velde onderskei het en ‘n beduidende bydrae tot die samelewing gelewer het.
Bekendes vereer
Luidens ’n verklaring deur die universiteit is die kandidate deur ‘n uitgebreide oorsigproses gekies, met elke nominasie wat deur die senaat én die universiteit se raad goedgekeur is.
Die jongste groep eredoktorsgrade is op 16 September deur die raad goedgekeur.
Ackerman, Galgut en McCloskey, saam met Strive Masiyiwa, wie se eredoktorsgraad in ingenieurswese in 2022 oorgestaan het, sal hul grade in Desember ontvang terwyl die ander ontvangers hulle s’n aanstaande jaar sal ontvang.
Musiek-ikoon
Die universiteit beskryf Butler as volg: “Die Suid-Afrikaanse musiek-ikoon Jonathan Butler sal die graad doktor in filosofie (DPhil) honoris causa ontvang vir sy musikale invloed en bydrae tot kuns en kultuur.
“Ondanks die feit dat Butler in die skaduwee van apartheid geleef het en as kind baie swaargekry het, was hy een van die eerste kunstenaars van kleur wie se musiek op ’n Suid-Afrikaanse radiostasie gespeel is en wat in daardie tyd op nasionale televisie verskyn het. Hy was een van die sleutelstemme in die internasionale arena wat vir die vrylating van Nelson Mandela en ander politieke gevangenes voorspraak gedoen het.
“Hoewel Butler eerste bekendheid in Afrika en Europa (Engeland) verwerf het, is hy eers in 1987 in die VSA raakgesien toe hy saam met die popster Whitney Houston getoer en haar konserte geopen het. Hy het toe ’n instrumentale album in die VSA vrygestel. Hy het internasionale sukses behaal met sy treffer-enkelsnit “Lies”, wat tot nommer 27 op Billboard se Hot 100-trefferlys geklim het en wat in 1987 vir ’n Grammy-toekenning genomineer is, asook met sy weergawe van die Staple Singers se liedjie “If You’re Ready (Come Go with Me)”, wat hy saam met Ruby Turner uitgevoer het.
“Ondanks sy internasionale sukses het Butler getrou gebly aan sy herkoms. Hy is die eerste wêreldvermaaklikheidsambassadeur vir die Lalela-stigting wat opvoedkundige kunste aan hoërisiko-jeug verskaf. Die Lalela-stigting bedien meer as 5 000 Suid-Afrikaanse leerders van verskillende ouderdomme per week deur sy kunskurrikulum en belangrike boodskapgemeenskappe.?
“Hy het in 2013 die Jonathan Butler-stigting van stapel gestuur, wat programme aanbied om minderbevoorregte kinders deur die kunste, en veral musiek, hoop te gee en hulle doelgerig te maak. Die stigting finansier musiekopvoedingsprogramme wat kinders ’n doel gee om ‘n lewe van dwelms en armoede te oorkom.?Hy is tans die ambassadeur van Arts Capital, ‘n niewinsgewende organisasie en lidmaatskaporganisasie wat voorspraak doen en kunstenaarswelstandsprogramme bedryf om te verseker dat kunstenaars toegang tot pensioenfondse, siekefondse, begrafnisdekking en ander finansiële ondersteuning het.”
Michael John Sias, susterskind van Butler en voorsitter van die Butler Jeug-ontwikkelingsprogram, sê hulle bars van trots oor hul familielid so vereer word. “Ons hoop van harte dat een van die leerders in ons programme ook eendag daardie hoogtes gaan bereik. Hy is weer eens ’n bewys dat jou agtergrond nie bepaal waarheen jy op pad is nie en dat dit jou nie moet terughou in die lewe nie,” sê Sias.
