Een vrou. Een hart – met baie dimensies van liefde.
In haar eerste solovertoning op Vrydag 17 Maart, het Lauren Solomons verras met haar skoonheid en haar diva-teenwoordigheid deur jou gunstelingliedjies van die mees ikoniese sangers van alle tye te sing.
Lauren is die suster van Daylin Sass, wat in 2021 aan Idols SA deelgeneem en na die top-5 deurgedring het.
Lauren sing al so lank as wat sy kan onthou, sê sy, en het al plaaslike kompetisies reg oor Kaapstad in die beginfase van haar sangloopbaan tussen die ouderdom van 16 en 27 jaar gewen, insluitend The Westgate Mall Voice Search, The Night Market Talent Competition in Adderly Street, The Station Plaza Competition, om net ‘n paar te noem.
Geleentheid om te skitter
Sass het besluit om sy suster die geleentheid te gee om te skitter.
“Ek wil haar nie net op in programme vertoon en haar net twee of drie liedjies laat sing en dan is dit dit nie. Ek wil hê die mense moet haar in al haar glorie ervaar.”
Dit is een van die hoofredes waarom Sass besluit het om sy suster haar eerste lewendige konsert te laat lewer terwyl hy terugsit.
“My ondersteuners is beslis ook hare. Hulle is lief vir haar, net so lief soos hulle vir my is. So ek dink dit is tyd dat sy alleen die verhoog inneem. En nou doen sy dit sommer by GrandWest.”
Lauren sê sy was baie opgewonde, maar terselfdertyd senuweeagtig. “Sing was nog altyd ’n groot passie en ek het my nog altyd verbeel ek het my eie solovertoning. My broer het my nou hierdie geleentheid gegee en ek neem uiteindelik hierdie geloofsprong,” sê sy.
Sy het van kleins af begin sing. Haar passie vir musiek het in die Nuwe Apostoliese Kerk begin, waar sy lid was van die Sondagskoolkoor. Sy het sedertdien haar vlerke gesprei en het op verskeie verhoë by baie geleenthede en vertonings opgetree. Sy is tans steeds deel van die kerk se koor.
“Ons oorlede pa was baie talentvol. Hy het ’n wonderlike stem gehad en dit is waar ons ons talent vandaan kry, veronderstel ek,” sê Lauren.
Spesiaal
Volgens Sass is dit die eerste van vele beplande geleenthede en produksies as vervaardiger-promotor, en die eerste een vir sy suster.
“Dit is vir my persoonlik regtig spesiaal.”
Sass verduidelik dat hy Lauren sy hele lewe lank gevolg het na elke optrede en kompetisie waaraan sy deelgeneem het toe hy grootgeword het.
“Dit is oor haar dat ek besluit het om ’n loopbaan in die musiekbedryf te volg. Ek was baie opgewonde om al 169 mense te laat hoor hoe Lauren haar eerste uitverkoopte vertoning ná byna 10 jaar lewer. Dit is ‘n opwindende tyd vir ons almal,” het Sass gesê.
