‘n Vliegtuig van British Airways moes Woensdagaand na die Kaapstad Internasionale Lughawe terugvlieg nadat daar rook in die kajuit was.
Die vliegtuig, ‘n Airbus A350, was glo reeds twee ure in die lug onderweg na Londen toe die vlieëniers die lughawe per radio laat weet het dat hulle gaan omdraai.
Luidens ‘n verklaring deur die Stad Kaapstad se burgemeesterskomiteelid vir veiligheid, JP Smith, het die Stad se nooddienste op ‘n “fase-twee-noodroep” gereageer en was vier brandweerwaens op bystand toe die vliegtuig land.
“Gelukkig kon die vlieëniers die enjins en die branstoftoevoer afskakel nadat hulle geland het. Die vliegtuig is na ‘n parkeergebied begelei waar die passasiers dit veilig verlaat het,” lui Smith se verklaring.
TygerBurger het navrae aan die Lughawensmaatskappy van Suid-Afrika gestuur, maar wag nog op terugvoer.
