In ’n jaarlikse inisiatief wat daarop gemik is om ’n liefde vir lees in die gemeenskap te kweek, het Rhynhardt Bresler, wyksraadslid, die afgelope Vrydag leesboeke ter waarde van R20 000 aan die Kraaifontein-biblioteek oorhandig.
Die voorraad is aangekoop met geld uit die wyksbegroting. Die boeke, wat ’n diverse verskeidenheid genres van kinderliteratuur tot kontemporêre fiksie insluit, is deel van Bresler se voortdurende verbintenis om mense aan die lees te kry.
“Boeke maak deure na nuwe wêrelde en idees oop,” sê Bresler.
“Deur ons plaaslike biblioteek te ondersteun, bevorder ons nie net geletterdheid nie, maar koester ons ook ’n kultuur van lewenslange leer. Dis belangrik dat ’n liefde vir lees van jongs af gekweek word. Nie net brei dit jou algemene kennis uit nie, maar dit berei kinders van jongs af voor vir hul studiejare. Vir senior burgers is lees nie net ontspanning nie, maar ook intellektuele stimulasie wat baie belangrik is vir afgetredenes.”
Met sowat 8 000 voete deur die deur elke maand, is die Kraaifontein- biblioteek een van die besigste in die stad, volgens Elzette Myburgh, senior bibliotekaresse.
Sy het haar dank uitgespreek vir die bydrae.
Huidige statistiek toon dat Kraaifontein-biblioteek tans 3 663 lede het, maar dit bedien ook baie gebruikers vanuit Eikendal, Brackenfell en Durbanville.
Vir die boekjaar Julie 2023 tot Junie 2024 het die biblioteek 102 835 boeke gesirkuleer.
