Verskeie atlete van Bellville-Suid is vanjaar weer uitblinkers.
Die atlete is ook lid van die Universiteit van Wes-Kaapland se atletiekklub.
Sezario Tafel en Tazlyn Meiring het albei verlede jaar bronsmedaljes gewen by die Wes-Kaapse skole-landloopkampioenskap in Somerset-Wes. Vanjaar het hulle weer podiumplekke behaal by die Wes-Kaapse skole-landloopkampioenskap in Stellenbosch en al twee het silwermedaljes ontvang.
Dié twee atlete is vanjaar, nes verlede jaar, in die Wes-Kaapse skole-landloopspan opgeneem, wat op Saterdag 4 Oktober aan die Suid-Afrikaanse Skole-atletiek se landloopkampioenskap in Mpumalanga deelgeneem het. Sezario het onder die top-10 in die land geëindig in die 3 km-landloop in die afdeling vir seuns o.12 en Tazlyn het 27ste klaargemaak.
Albei het ook onlangs Westelike Provinsie-Atletiek se landloopspan verteenwoordig by Atletiek Suid-Afrika se nasionale landloopkampioenskap in Mpumalanga saam met sewe ander spanmaats, Abby Wylbach, Aiden Davids, Trivago Kievieto, Skylah Lekcharoensuk, Taylor Oliphant, Mekhi Hassim en Briana Fortuin.
You must be logged in to post a comment.